Coimisiún Logainmneacha nua ainmnithe ag an Aire Ó Cuív

Scríofa ag Eamon Ó Cuív Dé Luain, 12 Deireadh Fómhair 2009

Nuacht - Preaseisiúintí

D'fhógair an tAire Gnóthaí Pobail, Tuaithe & Gaeltachta, Éamon Ó Cuív TD, inniu, 12 Deireadh Fómhair 2009, go bhfuil Coimisiún Logainmneacha nua ainmnithe aige. Beidh an Coimisiún ceaptha le héifeacht ó 12 Deireadh Fómhair 2009 ar feadh téarma trí bliana. Is í feidhm an Choimisiúin Logainmneacha ná comhairle a chur ar fáil faoi:

1. foirmeacha Gaeilge de logainmneacha a shonrú chun críocha dlí faoi mar a achtaítear i gCuid 5 d'Acht na dTeangacha Oifigiúla 2003.
2. scrúdú a dhéanamh ar logainmneacha na hÉireann mar a shainítear iad sin in alt 31 den Acht chun foirmeacha Gaeilge na logainmneacha sin a dheimhniú.
3. orduithe logainmneacha a ullmhú faoi mar a achtaítear in alt 32 den Acht.
4. foirmeacha logainmneacha Gaeilge nach n-áirítear san Acht, mar atá, sráidainmneacha.
5. foilsiú agus úsáid oifigiúil foirmeacha logainmneacha Gaeilge.
6. forbairt a dhéanamh ar thaighde agus staidéar ar logainmneacha in institiúidí tríú leibhéal agus institiúidí oideachais eile.
7. margaíocht chuí a dhéanamh ar thaighde an Bhrainse Logainmneacha.
8. nithe eile a bhaineann le logainmneacha na hÉireann

Is é príomhchúram an Bhrainse Logainmneacha taighde a dhéanamh chun leaganacha oifigiúla Gaeilge de logainmneacha na hÉireann a fhaomhadh agus a fhoilsiú. Tá leaganacha Gaeilge dena logainmneacha riaracháin curtha ar fáil ag an mBrainse go dtí seo i Luimneach, Lú, Port Láirge, Cill Chainnigh, Uíbh Fhailí, Muineachán, Tiobraid Árann, Gaillimh, Baile Átha Cliath, Loch Garman agus sna ceantair Ghaeltachta agus tá taighde ar siúl ar logainmneacha Chorcaí, Liatroma, an Chláir agus Dhún na nGall faoi láthair. Tá an Brainse ag soláthar leaganacha údarásacha Gaeilge dena sráidainmneacha go léir dona húdaráis áitiúla faoi láthair chomh maith i gcomhar le Suirbhéireacht Ordanáis Éireann.

Ag cur a bhuíochais in iúl don iar-Choimisiún a bhí ann ó Iúil 2006, rinne an tAire Ó Cuív TD, tagairt don éacht a bhí déanta ó shin ag an gCoimisiúin agus ag foireann an Bhrainse Logainmneacha, le deich nOrdú Logainmneacha dréachtaithe ó achtaíodh an tAcht Teanga acu (Cill Chainnigh, Lú, Luimneach, Muineacháin, Port Láirge, Tiobraid Árann, Uíbh Fháilí, Ceantair Ghaeltachta, lárionaid daonra agus dúiche; agus contaetha agus cúigí) agus thuig sé go raibh ceithre ordú eile á n-ullmhú ag deireadh a théarma trí bliana.

Ag fógairt na gceapachán seo, dúirt an tAire:

" Tá áthas orm go bhfuil daoine ón seanChoimisiún sásta leanacht ar aghaidh leis an obair ríthábhachtach atá idir lámha acu. Fáiltím roimh na baill nua agus tá súil agam go mbainfidh siad tairbhe agus taitneamh as a dtréimhse ar an gCoimisiún.

Tá sé fíor-thabhachtach go ndéanfaidh muid ár gcuid seanainmneacha a chaomhnú agus a úsáid. Tá ról lárnach ag an gCoimisiúin Logainmneacha sa phróiseas sin agus beidh mé ag súil le torthaí a chuid saothair a fheiceáil amach anseo. Guím gach rath orthu ina chuid oibre."

Tá liosta de bhaill an Choimisiúin Logainmneacha leis seo.

Liosta de bhaill an Choimisiún Logainmneacha

Athcheapacháin

Ceapacháin nua: